சுருக்கக் குறிப்பும் கருத்துரையும்- கிழக்கு மாகாணத்தில் தொல்பொருள் மரபுரிமை முகாமைத்துவத்திற்கான ஜனாதிபதி செயலணி

Image Credit-  Tamil Guardian 

2020 ஜூன் 02 ஆம் திகதிய 2178/17 இலக்க அதிவிசேட வர்த்தமானி அறிவித்தல் மூலம் கிழக்கு மாகாணத்தில் தொல்பொருள் மரபுரிமைக்கான ஜனாதிபதி செயலணியினை ஜனாதிபதி நிறுவியுள்ளார்.

‘ஜனாதிபதி செயலணியினை’ உருவாக்குவதற்கு எந்தச் சட்டத்தின் கீழ் ஜனாதிபதிக்கு அதிகாரம் வழங்கப்பட்டுள்ளது?

‘ஜனாதிபதி செயலணியினை’ உருவாக்குவதற்கு ஜனாதிபதியினை விசேடமாக இயலுமாக்கும் சட்டம் எதுவுமில்லை. அரசியலமைப்பின் உறுப்புரை 33 இன் கீழான அதிகாரங்கள் இதற்காகப் பயன்படுத்தப்பட்டுள்ளதாக வர்த்தமானி குறிப்பிடுகின்றது. அரசியலமைப்பின் உறுப்புரை 33 ஜனாதிபதியின் அதிகாரங்களைக் குறித்துரைக்கின்றது. ஜனாதிபதியினால் பின்வருவனவற்றினை நிறைவேற்ற முடியும் என இந்த உறுப்புரை தெளிவாகக் குறிப்பிடுகின்றது:

i. அரசியலமைப்பினை கௌரவித்துப் பற்றிப்பிடித்தல்,

ii. தேசிய நல்லிணக்கம் மற்றும் சமூக ஒருமைப்பாட்டினை மேம்படுத்தல்,

iii. அரசியலமைப்புச் சபை மற்றும் சுயாதீன நிறுவனங்களின் உரிய செயற்பாட்டினை வசதிப்படுத்தல்,

iv. தேர்தல் ஆணைக்குழுவிற்கு ஆலோசனை வழங்கி சுதந்திரமானதும் நீதியானதுமான தேர்தல்கள் நடத்தப்படுவதற்கான உரிய நிலைமைகள் உருவாக்கப்படுவதை உறுதிப்படுத்தல்,

v. அரசாங்கத்தின் கொள்கைப் பிரகடனத்தினைப் பாராளுமன்றத்தில் வெளியிடல்,

vi. பாராளுமன்றத்தின் வைபவரீதியான அமர்வுகளுக்குத் தலைமைதாங்குதல்,

vii. பாராளுமன்றத்தினைக் கூட்டுதல், ஒத்திவைத்தல் மற்றும் கலைத்தல்,

viii. தூதுவர்கள் மற்றும் உயர்ஸ்தானிகர்களை ஏற்றுக்கொள்ளல், அங்கீகரித்தல் மற்றும் நியமித்தல்,

ix. ஜனாதிபதி சட்டத்தரணிகளை நியமித்தல்,

x. குடியரசின் அரச முத்திரையினை வைத்திருத்தல்,

xi. யுத்தத்தினையும் சமாதானத்தினையும் பிரகடனப்படுத்தல்,

ஒii. அரசியலமைப்புடன் முரண்படாதவையான அவ்வாறான சகல விடயங்களையும் செயற்பாடுகளையும் நிறைவேற்றல்,

எமது அரசியலமைப்பின் 33 ஆம் உறுப்புரையில் கூட ஜனாதிபதி செயலணியினை உருவாக்குவதற்கான அவ்வாறான தனித்துவமான அதிகாரம் குறிப்பிடப்படவில்லை. மாறாக உதாரணத்திற்கு, 1978 ஆம் ஆண்டின் 07 ஆம் இலக்க விசாரணைச் சட்ட விசேட ஜனாதிபதி ஆணைக்குழுவினால் விசாரணைக்கான விசேட ஜனாதிபதி ஆணைக்குழுவினை உருவாக்குவதற்கு ஜனாதிபதிக்கு அதிகாரமுண்டு. எவ்வாறாயினும், ‘ஜனாதிபதி செயலணிக்காக’ அவ்வாறான விசேட சட்டம் இல்லை.

அரசியலமைப்புடன் ஒத்திசையும் அவ்வாறான சகல செயற்பாடுகளையும் நிறைவேற்றல் பற்றிய அரசியலமைப்பின் உறுப்புரையான 33.2(h) இன் பரந்த மொழியில் ஜனாதிபதி தங்கியுள்ளார் என்று மாத்திரமே ஒருவரினால் ஊகிக்க முடியும்.

வர்த்தமானியில் ‘ஜனாதிபதி செயலணிக்கு’ வழங்கப்பட்டுள்ள காரணங்கள்

i. எதிர்காலச் சந்ததிக்காக இலங்கையின் வரலாற்றுப் பாரம்பரியத்தினைப் பாதுகாத்தல்.