விவசாயிகள், மீனவர்கள் மற்றும் தோட்டத் தொழிலாளர்களின் நில உரிமைகளை உறுதிப்படுத்துவதே உணவுப் பற்றாக்குறையிலிருந்து விடுபடுவதற்கான சிறந்த வழியாகும் - காணி உரிமைக்கான மக்கள் கூட்டணி | PARL | PARL
விவசாயிகள், மீனவர்கள் மற்றும் தோட்டத் தொழிலாளர்களின் நில உரிமைகளை உறுதிப்படுத்துவதே உணவுப் பற்றாக்குறையிலிருந்து விடுபடுவதற்கான சிறந்த வழியாகும் - காணி உரிமைக்கான மக்கள் கூட்டணி
Published
1. உணவு நெருக்கடி நிலைமை
உணவுப் பாதுகாப்பின்மை, அபாயநேர்வுக்குள்ளாகியுள்ள வாழ்வாதாரங்கள் மற்றும் மருந்துப் பொருட்கள் போன்ற அத்தியாவசியப் பொருட்களின் மோசமான தட்டுப்பாடுகள் எனப் பல்வேறு பிரச்சினைகள் நிறைந்ததான ஒரு பொருளாதார நெருக்கடிக்கு இலங்கை முகங்கொடுத்துக் கொண்டிருக்கின்றது. கடுமையான உணவுப் பற்றாக்குறைகளும் உணவு விலைகளில் தொடர்ச்சியான அதிகரிப்புக்களும் பல மாதங்களுக்கு முன்னமே எதிர்வு கூறப்பட்டன. தொகை மதிப்பீடு மற்றும் புள்ளிவிபரத் திணைக்களத்தின் அறிக்கையின் படி உணவு விலைகள் 90.9% வரை அதிகரித்துள்ளன.
2022 செப்டெம்பரில் உலக உணவுத் திட்டம் வெளியிட்ட தரவுகளில், இலங்கையில் 63 லட்சம் மக்கள் அல்லது சனத்தொகையில் 30 சதவிகிதத்திற்கும் அதிகமானவர்கள் “உணவுப் பாதுகாப்பின்மைக்கு” முகங்கொடுப்பதும் அவர்களுக்கு மனிதநேய உதவி தேவைப்படுவதும் வெளிப்படுத்தப்பட்டுள்ளது. இவர்களுள், 53 லட்சம் மக்கள் தங்களின் உணவுகளைக் குறைத்து வருகின்றனர் அல்லது உணவினைத் தவிர்த்து வருகின்றனர். குறைந்தது 65600 பேர் கடுமையான உணவுப் பாதுகாப்பின்மைக்கு முகங்கொடுக்கின்றனர். நாட்டில் காணப்படும் உயர் பணவீக்கத்தின் காரணமாகவும் வாழ்வாதார இழப்பின் காரணமாகவும் பலவீனமான கொள்வனவுச் சக்தியின் காரணமாகவும் உணவு, மருந்து, சமையல் எரிவாயு மற்றும் எரிபொருட்கள் போன்ற அத்தியாவசியப் பொருட்களின் தீவிர பற்றாக்குறை காரணமாகவும் நெருக்கடிகள் தோன்றிவருகின்ற காரணத்தினால் இந்தச் சூழ்நிலை மேலும் மோசமடையும் சாத்தியம் காணப்படுகின்றது.
இலங்கையிலுள்ள சிறார்களில் 50 சதவிகிதத்திற்கும் மேற்பட்டவர்கள் ஏற்கனவே குறிப்பாக உணவுக்கான மற்றும் போஷாக்குக்கான அவசர உதவி தேவைப்படுபவர்களாக உள்ளனர் என ஐக்கிய நாடுகள் மதிப்பிட்டுள்ளது. இலங்கைச் சிறார்களில் 70 சதவிகிதமானவர்கள் கொவிட் பெருந்தொற்றும் பொருளாதார நெருக்கடியும் ஏற்பட முன்னரே வளர்ச்சி குன்றிக் குள்ளமாகியுள்ளனர் என உலக உணவு நிகழ்ச்சித்திட்டம் நடத்திய கணிப்பீடுகள் வெளிக்காட்டுகின்றன. அதாவது, இவர்களின் உயரமானது இவர்களின் வயதுக்கு இருக்கவேண்டிய உயரத்தினை விடக் குறைவானதாகக் காணப்படுவதுடன் 15 சதவிகிதமானவர்கள் அதீத உடல் மெலிவுக்குள்ளானவர்களாகவும் 5 வயதிற்குக் குறைவான சிறார்களில் 17 சதவிகிதமானவர்கள் உயரம் குன்றியவர்களாகவும் காணப்படுகின்றனர். இதன் அர்த்தமாவது இவர்களின் உயரத்திற்கு இருக்கவேண்டியதை விட இவர்கள் மிகவும் மெலிவாகக் காணப்படுகின்றனர். இந்த நெருக்கடியுடன், வருகின்ற நாட்களில் போஷாக்குப் பிரச்சினை இன்னும் மோசமடையும் என எதிர்பார்க்கப்படுகின்றது. 6 வயதுக்கும் 59 மாதங்களுக்கும் இடைப்பட்ட பிள்ளைகளில் 56000 பேர் தீவிர போஷாக்கின்மையுடன் சிகிச்சைக்காக அனுமதிக்கப்பட்டுள்ளனர் என யுனிசெப் இவ்வருடம் வெளியிட்டுள்ள வேண்டுகொளில் குறிப்பிடப்பட்டுள்ளது.
இறக்குமதிகள் மீதான கட்டுப்பாடுகளும் அதனைத் தொடர்ந்து கோதுமை, பருப்பு, பால் மா போன்ற பிரதான பண்டங்களில் ஏற்பட்ட பற்றாக்குறைகளும் இப்பண்டங்கள் கிடைக்கத்தக்கதாக இருக்கையில் எக்கச்சக்கமான விலைகளுக்கு விற்கப்படும் நிலையினை உருவாக்கியது. விவசாய உற்பத்திகளில் ஏற்பட்ட குறைவினால் அரிசி மற்றும் மரக்கறிகள் போன்ற பிரதான உணவுப் பொருட்களின் விலைகள் துரிதமாக அதிகரித்தன. மேற்குறிப்பிட்ட பிரதான உணவுகளைப் பெறுவதில் விதிக்கப்பட்ட கட்டுப்பாடும் அவற்றினை வாங்குவதற்கு இயலாத நிலைமையும் குடும்ப மட்டத்திலும் உணவுப் பாதுகாப்பு நிலையிலும் நேரடித் தாக்கத்தினை ஏற்படுத்தியுள்ளது.(1)
இலங்கையின் ஒட்டுமொத்த உணவு விலை அதிகரிப்பு 2021 ஆம் ஆண்டு முழவதிலும் அதிகரித்துக் காணப்பட்டதுடன் இது ஒரு வருடத்திற்கு முன்பு கிட்டத்தட்ட 22 சதவிகிதமாகக் காணப்பட்டது. கடன் சுமையினைக் குறைப்பதற்காக அரசாங்கத்தின் வருமானத்தினை 65 பில்லியனாக அதிகரிக்கும் எதிர்பார்ப்புடன் இலங்கை அரசாங்கம் பெறுமதி சேர் வரியினை 8 சதவிகிதத்தில் இருந்து 12 சதவிகிதமாக அதிகரித்து, பெருநிறுவன வரியினையும் அதிகரித்துள்ளது. (2)
துரித வீதத்தில் பணவீக்கம் அதிகரித்து வரும் நிலையில் அதிகரிக்கும் விலைகளுக்கு ஈடுகொடுப்பதற்காக நகரத்து மக்கள் உணவுப் பொருட்களை வாங்குவதற்குத் தங்களின் சேமிப்புக்களைக் கரைத்து வருகின்ற நிலையில் பெருந்தோட்ட மக்கள் உணவினையும் அத்தியாவசியப் பொருட்களையும் பெற்றுக்கொள்ள கடனில் தங்கியிருக்கும் நிலை உருவாகியுள்ளது. (3)
இலங்கையின் மொத்த சனத்தொகையில் சுமார் 2 மில்லியன் மக்கள் அல்லது 9 சதவிகிதமானவர்கள் விவசாயிகளாக உள்ளனர் மேலும் 21 லட்சம் குடும்பங்களைப் பிரதிநிதித்துவம் செய்யும் சனத்தொகையின் 40 சதவிகிதமானவர்கள் ஒன்றில் விவசாயத்தில் ஈடுபட்டுள்ளனர் அல்லது கால்நடை உற்பத்தியில் ஈடுபட்டுள்ளனர். சில மாவட்டங்களில் பொருட்கள் அந்த மாவட்டங்களிலேயே கிடைக்கக்கூடியதாக இருந்தாலும், சந்தைகளுக்கான நுகர்வோரின் அணுகல் 80 முதல் 90 சதவிகிதம் வரையிலான பாரிய வீழ்ச்சியினைக் காட்டுவது திருகோணமலையில் அறிக்கையிடப்பட்டுள்ளமையினை 2022 ஜூன் மாதத்தில் வெளியிடப்பட்ட உலக உணவுத் திட்டத்தின் மதிப்பீடு வெளிக்காட்டுகின்றது. திருகோணமலை மற்றும் முல்லைத்தீவு மாவட்டங்களைச் சேர்ந்த மரக்கறி வியாபாரிகள் அவர்களின் நாளாந்த விற்பனை 500 கிலோவில் இருந்து 50 கிலோவாகக் குறைவடைந்துள்ளதாக முறைப்பாடு செய்துள்ளனர்.
இதற்கான காரணம் அதிகரித்து வரும் விலைகளுக்கு ஈடுகொடுப்பதற்கான உத்தியாக நுகர்வோர் அவர்களின் கொள்வனவுகளின் அளவினைக் குறைத்துள்ளமையாகும்.
2. உணவுப் பாதுகாப்பினை அடைந்துகொள்வதில் சிறிய அளவிலான உணவு உற்பத்தியாளர்களின் முக்கியத்துவம்
உணவுப் பாதுகாப்பினை உறுதிப்படுத்துவதற்காக இலங்கையினால் இனிமேலும் உணவு இறக்குமதியில் தங்கியிருக்க முடியாது என்பதைக் கண்கூடாகக் காணக்கூடியதாக உள்ளது. நாம் எமது உள்நாட்டு உணவு உற்பத்தியினை அதிகரிக்க வேண்டும். எனவே, உணவு நெருக்கடியினை எதிர்கொள்வதற்கான எத்திட்டமும் நாட்டின் உணவு உற்பத்தியாளர்களின் பாதுகாப்பினை முன்னுரிமைப்படுத்த வேண்டும். இலங்கை விவசாயிகளில் பெரும்பான்மையானவர்களாக இருக்கும் சிறிய அளவில் உற்பத்தி மேற்கொள்ளும் உற்பத்தியாளர்களை விவசாயத்தில் இருந்து அகற்றுவதற்காகக் கடந்த 40 வருடங்களாக மேற்கொள்ளப்பட்ட சகல முயற்சிகளும் இலங்கையில் உணவு மற்றும் விவசாயத் துறைகளில் நெருக்கடிகள் துரிதமடைவதற்குப் பங்களிப்பு வழங்கியுள்ளன.
உணவு நெருக்கடிக்கான எமது பதிற்செயற்பாடுகள் சிறு உற்பத்தியாளர்களின் முக்கியத்துவத்தினை அங்கீகரிக்க வேண்டும் என்பதுடன், மொத்த வருடாந்த உணவு உற்பத்தியில் 80 சதவிகிதத்திற்குப் பங்களிப்பு வழங்குபவர்களாகச் சராசரியாக 2 ஹெக்டேயருக்கும் குறைவான நிலத்தில் பயிரிடும் சுமார் 1.65 மில்லியன் சிறுபற்றுநில விவசாயிகள் இருக்கின்ற காரணத்தினால் இவர்களின் உற்பத்தித்திறன் மற்றும் நிலைபேறானதன்மை ஆகியவற்றினை அதிகரிப்பதற்கு நடவடிக்கை எடுக்கப்பட வேண்டும்.(1)
உலகளாவிய ரீதியில், சிறிய அளவிலான உற்பத்தியாளர்களின் முக்கியத்துவம் பற்றிய சொல்லாடல் 2008 ஆம் ஆண்டின் உணவு நெருக்கடியினைத் தொடர்ந்து கணிசமாக மாற்றமடைந்துள்ளது. உலக உணவு முறைமையில் புறக்கணிக்க முடியாத மற்றும் பதிலீடு செய்யப்பட முடியாத பிரதான ஸ்தானங்களைச் சிறிய அளவிலான உற்பத்தியாளர்கள் கொண்டுள்ளனர் என்பது இப்போது உலகளாவிய ரீதியில் அங்கீகரிக்கப்பட்டுள்ளது. உலகில் காணப்படும் விவசாயப் பண்ணைகளில் ஆறு பண்ணைகள் ஒவ்வொன்றிலும் ஐந்து பண்ணைகள் இரண்டு ஹெக்டேயருக்கும் குறைவான நிலத்தினைக் கொண்டு அனைத்து விவசாய நிலங்களிலும் சுமார் 12 சதவிகிதத்தில் மாத்திரம் இயங்கி உலக உணவில் கிட்டத்தட்ட 35 சதவிகிதத்தினை உற்பத்தி செய்கின்றன என உணவு விவசாய அமைப்பின் உணவு மற்றும் விவசாயத்தினை நிலை பற்றிய 2014 ஆம் ஆண்டு அறிக்கை குறிப்பிடுகின்றது(2). உலகில் உள்ள 570 மில்லியன் விவசாயப் பண்ணைகளில் பத்தில் ஒன்பது பண்ணைகள் குடும்பங்களுக்குச் சொந்தமான பண்ணைகளாக இருப்பதுடன் உலக உணவில் சுமார் 80 சதவிகிதத்தினை இவையே உற்பத்தி செய்வதாக அறிக்கை மேலும் குறிப்பிடுகின்றது. குடும்ப விவசாயப் பயிர்ச்செய்கை ஐநா தசாப்தத்தினை பிரகடனப்படுத்தியமையும் (2019 – 28)(3) கிராமப் பிரதேசங்களில் வேலை செய்யும் குடியானவர்கள் மற்றும் ஏனையவர்களின் உரிமைகளின் ஐநா பிரகடனமும் உலக உணவு முறைமையில் சிறு உற்பத்தியாளர்களின் அதிகரித்துவரும் முக்கியத்துவத்தினை அங்கீகரிக்கின்றவையாக உள்ளன.(4)
சிறிய அளவிலான உற்பத்தியாளர்களின் காணி உரிமைகளை உறுதிப்படுத்தல்: சிறிய அளவிலான உணவு உற்பத்தியாளர்களை முன்னுரிமைப்படுத்துவது (பெண் விவசாயிகள் உள்ளடங்கலாக) இலங்கையில் காணி மற்றும் ஏனைய இயற்கை வளங்களை ஆளுகை செய்யும் கொள்கைகளில் மறுசீராக்கல்களையும் தேவைப்படுத்தும். காணிப் பாவனை, ஆளுகை மற்றும் நிர்வாகம் தொடர்பான கொள்கைத் தீர்மானங்கள் சிறிய அளவிலான உற்பத்தியாளர்களின் வாழ்வாதாரப் பாதுகாப்பினை முன்னுரிமைப்படுத்தி நுண்மைமிக்க சுற்றாடல் முறைமைகளின் பாதுகாப்பினையும் உறுதிப்படுத்த வேண்டும்.
3. சிறிய அளவிலான உணவு உற்பத்தியாளர்களுக்கான காணி
காணிக்கான மற்றும் ஏனைய இயற்கை வளங்களுக்கான உணவு உற்பத்தியாளர்களின் உரித்தாண்மையினையும் அணுகலையும் உறுதிப்படுத்துவது அவர்களின் வாழ்வாதாரப் பாதுகாப்பிலும் அவர்களின் உணவு உற்பத்தி ஆற்றல்களை அதிகரிப்பதிலும் அத்தியாவசியமான தேவைப்பாடாகும். ஆனால், கடந்த சில தசாப்தங்களாக நிலவிவந்த மோதல்களும் பேரண்டப் பொருளாதார மற்றும் அபிவிருத்திக் கொள்கைகளும் பேரினவாத அரசியல்களும் ஆயிரக்கணக்கான உணவு உற்பத்தியாளர்கள் அவர்களின் அத்தியாவசியமான இயற்கை வளங்களை இழந்து அதன் காரணமாக அவர்களின் வாழ்வாதாரங்களை இழப்பதற்குக் காரணமாகியுள்ளது.
காணி உரிமைக்கான மக்கள் கூட்டமைப்பினால் 2020 ஆம் ஆண்டும் 2021 ஆம் ஆண்டும் ஏற்பாடு செய்யப்பட்ட மக்கள் காணி ஆணைக்குழு, உள்நாட்டு உணவு உற்பத்தியாளர்களின் பின்வரும் பிரதான காணி உரிமைகள் மீறப்பட்டுள்ளதைக் கண்டறிந்தது:
1. இராணுவமயமாக்கம் - மோதல்களின் போது வடக்கு மற்றும் கிழக்கு மாகாணங்களில் பெற்றுக்கொள்ளப்பட்ட காணிகள் தொடர்ந்தும் இராணுவத்தினதும் பொலிசினதும் கட்டுப்பாட்டின் கீழேயே உள்ளன. இதன் காரணமாக இக்காணிகளில் முன்னர் வாழ்ந்த சமுதாயங்களில் பல அவற்றின் சொந்தக் காணிகளுக்கு மீண்டும் செல்ல முடியாத நிலையில் உள்ளன. முள்ளிக்குளத்திலும் கேப்பாப்பிலவிலும் யாழ்ப்பாணத்திலும் கிளிநொச்சியிலும் (WU1) தமிழ்க் குடும்பங்களுக்குச் சொந்தமான காணிகளை இராணுவம் ஆக்கிரமித்துள்ளது. இதேபோன்று, அம்பாறை மற்றும் மட்டக்களப்பு மாவட்டங்களில் (WU2) பல இடங்களில் காணிகளை இராணுவம் ஆக்கிரமித்துள்ள காரணத்தினால் சிங்கள மற்றும் முஸ்லிம் மீனவர்களும் விவசாயிகளும் அவர்களின் காணிகளுக்குச் செல்வதில் இருந்தும் தடுக்கப்படுகின்றனர். இராணுவம் பயிர்ச்செய்கையில் ஈடுபட்டு உள்ளூர்ச் சந்தைகளில் உற்பத்திகளை விற்பனை செய்வதால் உள்ளூர்ப் பொருளதாரத்திலும் ஈடுபட்டு உள்ளூர் உற்பத்தியாளர்களின் சந்தைகளுக்கான வாய்ப்பினையும் தட்டிப் பறித்துள்ளது.
2. காட்டுயிர்களின் பாதுகாப்புக்காக அல்லது தொல்பொருளியல் தளங்களுக்காக விவசாயக் காணிகளைப் பெற்றுக்கொள்ளல் - உணவு உற்பத்திக்காகப் பயன்படுத்தப்பட்ட தமது காணிகள் காட்டுயிர்களைப் பாதுகாத்தல் எனும் நோக்கத்திற்காகவும் வனப் பாதுகாப்பு எனும் நோக்கத்திற்காகவும் தொல்லியல் தளங்களின் பாதுகாப்பு எனும் காரணங்களுக்காகவும் சடுதியாகவும் தன்னிச்சையாகவும் பறிக்கப்பட்ட பல சமுதாயங்களை ஆணைக்குழு வடக்கிலும் கிழக்கிலும் சந்தித்தது. உள்;ர்ச் சமுதாயங்கள் உணவு உற்பத்திக்காகத் தமது வளங்களை அணுகுவதை இது தடைசெய்துள்ளது.
காணி பறிப்புக்கு முகங்கொடுத்த முஸ்லிம்கள் சிறுபான்மையினராக வாழும் முல்லைத்தீவு போன்ற பிரதேசங்களில் இவ்வாறான சம்பவங்கள் ஆணைக்குழவின் கவனத்திற்குக் கொண்டுவரப்பட்டன. வில்பத்து மற்றும் திருகோணமலை ஆகிய இடங்களில் உள்ள சமுதாயங்களினாலும் இதேபோன்ற முறைப்பாடுகள் முன்வைக்கப்பட்டன. கிரான்கோமல், கோமாரிமணல், கனகர் கிராமம் (பொத்துவில் பிரதேச செயலாளர் பிரிவு), மற்றும் பலத்தவத்த (இறக்காமம் பிரதேச செயலாளர் பிரிவு) ஆகிய இடங்களில் வனத் திணைக்களம் காணிகளைக் கையகப்படுத்தியுள்ளது. இக்காணிகள் அனுமதிப் பத்திரம் வைத்திருந்த விவசாயிகளிடம் இருந்து முன்பு இராணுவத்தினால் கையகப்படுத்தப்பட்டவையாகும். அம்பாறையில் உள்ள வேகாமத்தில் (பொத்துவில்) 1990 இல் யுத்தத்தின் போது வெளியேறிய விவசாயச் சமுதாயத்தினர் 2010 மற்றும் 2011 ஆம் ஆண்டுகளில் திரும்பி வந்தபோது தமது காணிகள் லகுகல தேசிய பூங்காவிற்காக வேலியிடப்பட்டிருப்பதைக் கண்டனர். யுத்தத்தின் காரணமாக 1987 ஆம் ஆண்டில் இதயபுரம் மற்றும் கரன்கோவை மேற்கு, அமவெட்டன் மற்றும் வேகாமம், மதுரன் வெளி (அம்பாறை) ஆகிய இடங்களில் இருந்து வெளியேறிய சமுதாயத்தினரின் காணிகளை (அனுமதிப் பத்திரங்களுடனானவை) வனத் திணைக்களம் கையகப்படுத்தியுள்ளது. இவர்கள் மீண்டும் தமது காணிகளுக்குத் திரும்பி வந்தபோது அக்காணிகளை வனத் திணைக்களம் கையகப்படுத்தியுள்ளதைக் கண்டனர். பொத்துவில் பிரதேச செயலகப் பிரிவில் உள்ள துக்வெல்ல மற்றும் சேம்பாவெளி போன்ற சமுதாயங்களும் திருகோணமலைக்கு அண்மையில் உள்ள வேல்வேரிச் சமுதாயத்தினரும் தங்களின் காணிகளை வனத் திணைக்களம் கையகப்படுத்தியுள்ள காரணத்தினால் தமது வாழ்வாதாரப் பயிர்ச்செய்கையில் ஈடுபடுவதில் சிரமங்களுக்கு முகங்கொடுக்கின்றனர். அம்பாறை மாவட்டத்தில் திருக்கோவில் பிரதேச செயலகப் பிரிவில் உள்ள தோணிக்கல் மற்றும் வட்டமடு மற்றும் பொத்துவில் பிரதேச செயலகப் பிரிவில் உள்ள கோமாரி ஆகிய பிரதேசங்களைச் சேர்ந்த 80 வருடங்களுக்கும் மேலாகப் பயிர்ச்செய்கையில் ஈடுபட்டவர்களின் (யுத்தத்தின் போதும் கூட) காணிகளும் வனத் திணைக்களத்தினால் கையகப்படுத்தப்பட்டுள்ளன. இவர்களை வன அதிகாரிகளும் பொலிசாரும் பலவந்தமாக வெளியேற்றி இவர்களுக்கு எதிராக வழக்குத் தாக்கல் செய்துள்ளனர். சுண்டிக்குளத்தில் தேசிய பூங்கா அமைத்தமை சமுதாயத்தினர் தங்களின் விவசாய நிலங்களுக்குச் செல்வதற்குத் தடையேற்படுத்தி அவர்களின் வாழ்வாதாரங்களைப் பாதித்துள்ளது.
3. சுற்றுலாத் துறைக்காகவும் உட்கட்டமைப்பு அபிவிருத்திக்காகவும் பாரிய அளவிலான ஏற்றுமதி சார் விவசாயத்திற்காகவும் காணிகளைக் கையகப்படுத்தல் - ஆணைக்குழவினைப் பல மாவட்டங்களிலும் சந்தித்த உள்ளூர் விவசாய சமுதாயத்தினர் நகரமயமாக்கம் பற்றியும் தனியார் தொழில்முனைவுகளுக்காக விவசாயக் காணிகளை ஒதுக்குதல் தொடர்பாகவும் பல்வேறு அமைச்சுக்களால் காணிகள் பலவந்தமாகக் கொள்ளப்படுவதால் தமது காணிகளின் அளவு சுருங்குதல் தொடர்பாகவும் முறைப்பாடு செய்துள்ளனர். இது விவசாயிகள் தமது காணிகளில் பாரம்பரிய முறைகளைப் பயன்படுத்திப் பயிர்செய்வதையும் கடினமாக்கியுள்ளதுடன் (உதா: தொடர்ச்சியான பருவங்களில் பல்வேறு விவசாயக் காணிகளுக்கு இடையில் மாறி மாறிப் பயிர்செய்தல்) சமுதாயத்தினரின் வாழ்வாதாரங்களையும் பாதித்துள்ளது. இதனால் சிலர் விவசாயம் செய்வதற்குப் பதிலாகக் கடைகளைத் திறப்பதெனத் தீர்மானித்துள்ளனர்.
உள்ளூர்ச் சமுதாயங்களின் வாழ்வாதாரங்களுக்கு முக்கியமான காணிகளைப் பல தனியார் துறைக் கம்பனிகள் கையகப்படுத்தியுள்ளன. காலி மாவட்டத்தில் கடற்கரையின் ஒரு பகுதியினை ரிடு ஹோட்டல் கையகப்படுத்தியுள்ளது. ஹம்பாந்தோட்டையில் பார் விலேஜ் ஹோட்டல் வனசீவராசிகள் பாதுகாப்புத் திணைக்களத்தினால் சமுதாயத்திற்கு வழங்கப்பட்ட காணிகளைக் கையகப்படுத்தியுள்ளது. இவற்றுள் ஹம்பாந்தோட்டையில் உள்ள வாழைப்பழ மற்றும் மாம்பழப் பெருந்தோட்டக் கம்பனியும் அடங்குகின்றது. அந்தரவேவ வனத்திற்குச் சொந்தமான காணியில் கட்டப்பட்டுள்ள பொரஸ்ட் ரொக் ஹோட்டல் குடா வேவவுக்குப் பாதிப்பினை ஏற்படுத்துகின்றது. கொஸ்கொடவில் உள்ள கழிவு முகாமைத்துவ முன்னெடுப்புக்கள் விவசாயக் காணிகளைக் கையகப்படுத்தி மேற்கொள்ளப்படுகின்றது. மேலும் திருகோணமலையிலும் இதுபோன்ற பல ஹோட்டல்களும் தனியார் வியாபாரங்களும் காணப்படுகின்றன. அம்பாறையில் உள்ள பாணமயில் கடற்கரைச் சொத்துக்களை வர்த்தக நிறுவனங்களும் ஹோட்டல்களும் கையகப்படுத்தியுள்ளதால் தமது கரைவலைச் செயற்பாடுகள் பாதிக்கப்பட்டுள்ளதாகச் சமுதாயத்தினர் முறைப்பாடு செய்துள்ளனர் (சர்வதேச இடையீடுகளும் முதலீடுகளும் உலக வங்கிக் கொள்கைகளுமே பிரதேசத்தில் சுற்றுலாத் துறை தழைத்தோங்கக் காரணமாகும்(5). விதை ஆராய்ச்சிக்காகப் பயன்படுத்தப்பட பொலநறுவையில் ஒதுக்கப்பட்ட 2000 ஏக்கர் காணி சிஐசி ஹோல்டிங்சுக்கு 50 வருடக் குத்தகைக்காக வழங்கப்பட்டுள்ளது. எவ்வாறாயினும், சிஐசி அதில் பயிர்ச்செய்கையில் ஈடுபட்டுள்ளதாக அயலிலுள்ள விவசாயிகள் தெரிவித்துள்ளனர். சிஐசி சுற்றாடலுக்கு ஏற்படும் தாக்கத்தினைப் பற்றிப் பொருட்படுத்தாமல் பீடைக்கொல்லிகளை மிகையாகப் பயன்படுத்துவதாகவும் மக்கள் முறைப்பாடு செய்கின்றனர். ஏற்றுமதி சார்ந்த உற்பத்திக்காக பதுளை மாவட்டத்தில் ரிதீமலியத்தவிலும் அநுராதபுரத்திலும் ஆயிரக்கணக்கான ஏக்கர் விவசாயக் காணிகளை வெளிநாட்டுக் கம்பனிகளுக்கு வழங்குவதற்கான அண்மைக்கால முயற்சிகள் பற்றி முறைப்பாடுகள் மேற்கொள்ளப்பட்டுள்ளன.
உணவு உற்பத்திக்காகப் பயன்படுத்தப்பட்ட காணிகளை வேறு நோக்கங்களுக்காக எடுப்பது உள்ளூர்ச் சமுதாயத்திற்கும் ஒட்டுமொத்த நாட்டுக்கும் உணவுப் பாதுகாப்புத் தொடர்பான ஆபத்தினை ஏற்படுத்தியுள்ளது.
4. பெருந்தோட்டச் சமுதாயங்களின் காணி உரிமைகள் - பெருந்தோட்டச் சமுதாயங்களின் வாக்குரிமைப் பறிப்பும் தீர்மானம் வகுத்தலில் அவர்களை முறைமைவாய்ந்த வகையில் விலக்கிவைத்தமையும் அவர்களின் வாழ்க்கை நிலைமைகளில் பாரதூரமான பாதிப்புக்களை ஏற்படுத்தியுள்ளன. பெருந்தோட்டச் சமுதாயங்களுக்குக் காணிகளை விநியோகிப்பதற்காகக் கொள்கைகள் அறிமுகப்படுத்தப்பட்ட போதிலும் பணித்துறையினரின் செயற்பாடின்மைகளினால் பெருந்தோட்டத் துறையில் காணியற்ற நிலை சதா தொடர்கின்றது.
வீடமைப்புக்கும் விவசாயக் காணிகளுக்கும் அணுகல் இல்லாத காரணத்தினால் பெருந்தோட்டங்களில் வாழும் குடும்பத்தினர் பாரிய உணவுப் பாதுகாப்பின்மை ஆபத்தினை எதிர்நோக்கியுள்ளனர். பல்வேறு வீடமைப்புத் திட்டங்களின் கீழ் சில குடும்பங்களுக்கு ஒதுக்கப்பட்ட 7 பேர்ச் காணிகள் இக்குடும்பங்கள் அவற்றின் உணவுத் தேவைக்குப் பயிர் வளர்ப்பதற்கே போதாததாகக் காணப்படுகின்றது..
4. பரிந்துரைகள்
தற்போதைய உணவு நெருக்கடியினைத் தீர்ப்பதற்கான அவசரமான மற்றும் அவசியமான முன்தேவைப்பாடாகப் பின்வரும் பரிந்துரைகளை அமுல்படுத்துவதன் மூலம் உள்ளூர் உற்பத்தியாளர்களுக்கான காணி உரிமைகளை உறுதிப்படுத்துமாறு காணி உரிமைக்கான மக்கள் கூட்டமைப்பு அரசாங்கத்தினை உறுதியாக வேண்டிநிற்கின்றது.
1. இராணுவத்தினால் எடுக்கப்பட்ட காணிகளை மக்களுக்கும் சமுதாயத்தினருக்கும் மீள வழங்குவதற்கு அரசாங்கம் உடனடியாக ஒரு நிகழ்ச்சித்திட்டத்தினை அமுல்படுத்த வேண்டும். திரும்பி வரும் சமுதாயங்கள் தமது காணிகளில் விவசாய நடவடிக்கைகளையும் ஏனைய வாழ்வாதார நடவடிக்கைகளையும் ஆரம்பிப்பதற்கு அரசாங்கம் போதிய உதவியினை வழங்கவேண்டும். காணி ஆக்கிரமிப்பின் போது ஏற்பட்ட இழப்புக்களுக்காக நட்டஈடு வழங்கப்பட வேண்டும்.
2. பாதுகாப்பு அச்சுறுத்தல்களால் மக்களினால் அவர்களின் சொந்தக் காணிகளுக்குத் திரும்ப முடியாதிருந்து (அல்லது அவர்கள் வெளிப்படுத்தும் ஏதாவது நியாயமான காரணங்களினால்) அவர்கள் மாற்றுக் காணிகளை ஏற்றுக்கொள்ள ஆர்வம் காட்டினால், அவ்வாறான மாற்றுக் காணிகள் மக்களின் வாழ்வாதாரத் தேவைகளையும் கல்விக்கான அணுகலையும் பொதுப் போக்குவரத்துக்கான அணுகலையும் அடிப்படைச் சேவைகளுக்கான அணுகலையும் கருத்தில் கொள்ளவேண்டும்.
3. ஹோட்டல் நடத்துவது, பயிர்ச்செய்கையில் ஈடுபடுவது மற்றும் ஏனைய வர்த்தக நடவடிக்கைகள் போன்ற இராணுவத்தின் வியாபாரங்கள் கட்டாயம் நிறுத்தப்பட வேண்டும்.
4. வனக் காணிகள் எனவும் வனசீவராசிகள் பாதுகாப்புக்கான காணிகள் எனவும் தன்னிச்சையாக ஒதுக்கப்பட்ட தனியார் விவசாயக் காணிகளை அடையாளம் காண்பதற்கு உடனடியாகப் பிரதேச மட்டத்தில் (பிரதேச செயலகத்தின் கீழ்) நிகழ்ச்சித்திட்டம் ஒன்றினை அமுல்படுத்தி அக்காணிகளை விவசாயிகளிடம் மீண்டும் பயிர்ச்செய்கைக்காக ஒப்படைத்தல். சுற்றியுள்ள சுற்றாடல் முறைமைகளைப் பாதுகாப்பதை உறுதிப்படுத்துவதற்காகக் கலப்புப் பயிர்ச்செய்கையுடன் இக்காணிகளை வனத் தோட்டங்களாக உருவாக்க விவசாயிகளுக்கு உதவுதல். இவ்வாறான காணிகள் ஒவ்வொன்றும் தனித்தனியாக அடையாளப்படுத்தப்பட வேண்டும் என்பதுடன் இதன்போது இக்காணிகளின் உரித்தாண்மை மற்றும் முன்னைய பாவனைக்கான ஆதாரம், சுற்றாடல் நுண்மைத்தன்மை உள்ளூர்ச் சமுதாயத்தினரின் வாழ்வாதாரங்கள் மற்றும் உணவுப் பாதுகாப்பு நோக்கங்களுக்காக அக்காணிகளின் முக்கியத்துவம் ஆகியவை கருத்தில் கொள்ளப்பட வேண்டும்.
5. தமது வாழ்வாதார நோக்கங்களுக்காக உள்ளூர் உற்பத்தியாளர்களினால் பயன்படுத்தப்பட்ட காணிகளை எக்காரணம் கொண்டும் அபிவிருத்திக் கருத்திட்டங்களுக்காகவும் சுற்றுலாத் துறைக்காகவும் அல்லது கைத்தொழில் விவசாயக் கருத்திட்டங்களுக்காகவும் பெறுவதற்கான முயற்சிகள் உடனடியாக நிறுத்தப்பட வேண்டும். மாற்றாக, சமுதாயங்களின் வாழ்வதாரங்களையும் உணவு உற்பத்தி முறைமைகளையும் அபிவிருத்தித் திட்டங்களாக ஒருங்கிணைக்கும் சமுதாய அடிப்படையிலான சுற்றுலாத் துறை மற்றும் ஏனைய அபிவிருத்திக் கருத்திட்டங்களை உருவாக்குவதற்குச் சமுதாயங்களுக்கு உதவி வழங்கப்பட வேண்டும்.
6. அபிவிருத்திக் கருத்திட்டங்களுக்காகக் காணிகள் ஏற்கனவே பெறப்பட்டுப் பயன்படுத்தப்பட்ட உணவு உற்பத்தியாளர்களின் காணிகளுக்கான மாற்றுக் காணிகளை அவர்கள் வாழ்வாதாரங்களை மீண்டும் தொடங்க அவசியமான உட்கட்டமைப்புடன் வழங்குவதற்கான திட்டங்கள் அமுல்படுத்தப்பட வேண்டும். இவர்களுக்கு ஏற்பட்ட இழப்பிற்காக உரிய நட்டஈடு வழங்கப்பட வேண்டும்.
7. ஒவ்வொருவருக்கும் ஒரு வீட்டுடன் குறைந்தது 20 பேர்ச் காணிகள் பெருந்தோட்டங்களில் வசிக்கும் அனைவருக்கும் அவர்கள் பெருந்தோட்டங்களுக்காக வேலை செய்வதன் பலனாக வழங்கவேண்டும். இக்காணிக்கான பூரண உரித்தாண்மை முறையான உறுதியுடன் வழங்கப்பட வேண்டும். இதனால் இம்மக்கள் தங்களின் காணிகளை வீடமைப்புக்காகவும் வீட்டுக்கான உணவு உற்பத்திக்காகவும் எவ்வாறு பயன்படுத்தவேண்டும் என்ற தீர்மானத்தினை எடுப்பதற்கான சுதந்திரத்தினைக் கொண்டிருப்பர். காணிக்கான சமமான உரித்தாண்மையினைப் பெண்கள் பெறுகின்றனர் என்பதை உறுதிப்படுத்தல்.
8. உணவுப் பயிர்ச்செய்கைக்காகப் பயிர்செய்யப்படாத மற்றும் கைவிடப்பட்ட பெருந்தோட்ட நிலங்களைப் பெருந்தோட்டத் தொழிலாளர்கள் மத்தியில் விநியோகித்தல். பல்வகமைப்படுத்தப்பட்ட விவசாய வனமாக ஏகவினப் பெருந்தோட்டக் காணிகளை உருவாக்குவதற்குப் பெருந்தோட்டத் தொழிலாளர்களுக்கு உதவிவழங்கி இதன் மூலம் பெருந்தோட்டச் சிறுபற்று நிலச் சொந்தக்காரர்களாகப் பெருந்தோட்டச் சமுதாயத்தினர் ஈடுபடுவதை மேம்படுத்தல்.
9. நுகர்வுக்காக உணவுப் பயிர்களை வளரப்பதற்கு அனுமதி பெறவேண்டிய தேவை அல்லது பெருந்தோட்டக் காணிகளில் உள்ள வளங்களைப் பயன்படுத்த அனுமதி பெறவேண்டிய தேவை போன்ற பெருந்தோட்டத் தொழிலாளர்களின் வாழ்விலும் தங்குமிடங்களிலும் விதிக்கப்பட்டுள்ள வாழ்வாதாரக் கட்டுப்பாடுகளையும் வரம்புகளையும் அகற்றல்.
10. திடீரென விதிக்கப்பட்ட திட்டமிடப்படாத இரசாயன உரத் தடையினால் நிதி இழப்புக்களுக்கு முகங்கொடுத்த விவசாயிகளுக்குப் போதிய நட்டஈடு வழங்கல்.
11. குடும்ப மட்ட மற்றும் சமுதாய மட்ட உணவுப் பாதுகாப்பினை உறுதிப்படுத்தும் முயற்சியாக சிறிய அளவிலான விவசாயிகளுக்கு விவசாய மானியத் திட்டத்தினை அறிமுகப்படுத்தல்.
11. அரசாங்க விரிவாக்கல் சேவைகள் மூலமாகக் காலநிலை மீண்டெழுந்தன்மை மிக்க விவசாயச்சூழியல் பயிர்ச்செய்கை நடைமுறைகளை மேம்படுத்தல் (சேதனப் பசளையினை விநியோகித்தல், சுதேச விதை வகைகள், பொருத்தமான தொழில்நுட்பப் பயிற்சிகள்)
